Buks Viljoen

Buks begin sy joernalistieke loopbaan in Maart 1984 as kadet-verslaggewer by die Middelburg Observer.

Sommer vroeg in sy loopbaan ontdek hy sy twee passies in die nuuswêreld: harde nuus en ondersoekende verslaggewing.

In 1986 palm hy sy eerste joernalistieke toekenning in vir ‘n ondersoek oor die privatisering van ‘n reservaat naby Middelburg. Hy plaas soveel druk op die munisipaliteit met die een onthulling na die ander, dat hulle die projek kanselleer.

In 1989 kry hy ‘n aanstelling by die gesogte Laevelder in Nelspruit, Mpumalanga. Daar bou Buks voort op sy harde nuus en ondersoekende werk, maar raak ook betrokke by hofverslaggewing. In die sestien jaar wat hy by Laevelder werk palm hy verskeie joernalistieke toekennings in vir onder meer beste SA nuus, harde nuus, menslike nuus en ondersoekende beriggewing.

In 2004 verwerf hy die gesogte Nat Nakasa-joernalistieke prys vir dapperheid, deursettingsvermoë en volharding om ondersoekende joernalistiek suksesvol te doen.

Kort nadat hy in 2005 as Caxton se joernalis van die jaar aangewys is, kry hy ‘n aanstelling by Beeld as buitekantoorverslaggewer in Mpumalanga. Na Media24 se herstrukturering werk hy vir Netwerk24 tot en met sy aftrede in 2018. Tans vryskut hy vir onder meer News24 en Laevelder.

Buks bied ons Harde Nuus-verslaggewingkursus aan.