Welkom by SA Vryskutskrywer - Mediamekka

 

Boekrak

 

Hierdie gedeelte is spesiaal vir Afrikaanse boekwurms met vars nuus oor skrywers, digters en boeke.


Onregmatige handel in e-boeke is ’n misdaad

Maandag 24 Junie 2013

Mense wat skuldig bevind word aan die onregmatige handel in e-boeke, kan ’n boete van R5 000 of drie jaar tronkstraf vir dié misdaad opgelê word, sê André Myburgh, ’n regsgeleerde wat in kopiereg in die uitgewersbedryf spesialiseer.

Skending van kopiereg op letterkundige werke word deur die Wet op Outeursreg van 1978 gereguleer. “’n ‘Letterkundige werk’, soos in dié wet gedefinieer, kan op skrif gestel word of ook in digitale data vasgelê word om vir kopieregbeskerming te kwalifiseer,” sê Myburgh. Waar roofboeke op die internet te koop of selfs gratis aangebied word, gaan dit gewoonlik om reproduksies van ’n boek of ’n e-boek wat sonder die toestemming van die reghebbende (soos die skrywer en die uitgewery) gemaak is, sê hy.

“Die maak van daardie reproduksie in sulke omstandighede kom gewoonlik neer op ’n skending van die kopiereg op sowel die skrywer se letterkundige werk as die gepubliseerde uitgawe van die uitgewery.”

Volgens Myburgh kan ’n reghebbende siviele aksie om skadevergoeding instel en ’n interdik teen die skending van sy kopiereg kry. “Waar ’n roofboek op die internet aangebied word, kan die reghebbende in sekere omstandighede ’n afhaalkennisgewing aan die webwerf se internet-diensverskaffer stuur. Dit kan dan beteken dat die skakel na die roofboek, of selfs die hele webwerf, verwyder word.

“Dit gebeur eenvoudig te veel dat werke wat onderworpe is aan kopiereg deur mense anders as die reghebbendes te koop of oënskynlik gratis op die internet aangebied word. “Ek sê oënskynlik gratis omdat die aanbieder van gratis roofkopieë dikwels geld maak deur reklame op sy webwerf, waar die werk van ander mense – waarvoor hy nie betaal het nie – gebruik word om klante na die webwerf te lok.” – Rudolf Stehle

- Bron: Beeld

 

 

     

 

 

Nog nie op ons GRATIS nuusbrief ingeteken nie? Klik hier en kry dadelik jou geskenk en geheime kodes wanneer jy jou intekening bevestig.

     Vertel 'n vriend van ons  

 

 Tuisblad                    Skryfkursusse                    Blitskursusse

Sluit venster