Kontak Carla                              

                               

      Carla van der Spuy

Kursussamesteller en -opleier:    Ware lewensdramas                Inspirasie-artikels                Humorartikels

Carla van der Spuy het 38 jaar ervaring as joernalis waarvan sy 19 jaar lank al vryskutjoernalis is.

Sy skryf meestal vir publikasies  soos Vrouekeur, LIG en Beeld en het ook al bydraes vir rooi rose, KerkbodeBy  en webtuistes soos Kletskerk en Boekblik gelewer. Sy doen ook werk vir LAPA-uitgewers  wat behels dat sy manuskripte lees en dan onderhoude met die skrywers voer.

Haar artikels behels ‘n wye verskeidenheid van onderwerpe wat wissel van inspirasie en lewensdrama tot aktueel, humor en rubrieke.

Sy het deur die jare by verskeie groot dagblaaie soos Die Transvaler en Vaderland asook by streekkoerante gewerk.

Carla het in 2008 die meriete toekenning in die Caxton Journalist of The Year  Awards ontvang waarvoor sy vyf artikels moes inskryf wat deur die jaar verskyn het. Die beoordelaars het veral melding van haar veelsydigheid gemaak.

Sy het einde 2010 nóg drie merietetoekennings by haar ellelange lys gevoeg toe sy bekroon is by die Caxton Magazines Excellence Awards vir haar artikels  in die gesondheid-, in-diepte- en Skrywer van die Jaar-kategorieë. En in 2011 het sy voortgebou op die lys merietetoekennings met nóg een, asook 'n spesiale vermelding in die Skrywer van die Jaar-kategorie.

'n Vollengte boek, Platsakwenke, het reeds uit haar pen verskyn en haar tweede boek, Mens of Monster, het pas by LAPA-uitgewers verskyn.

Carla woon saam met haar man, Romano. Haar dogter, Tanya, is ‘n kopieskrywer en vryskutjoernalis in Kaapstad en haar seun, Louwtjie, studeer regte aan Tuks.

Sy is gek na kunstefeeste soos die KKNK, kuiertjies in die Kaap en Klein Karoo, lees uiteraard baie vir navorsing vir haar stories en bied ook water aërobiese-klasse  by 'n plaaslike gim aan.

Sy glo om ‘n suksesvolle vryskutjoernalis te wees moet jy die benadering: “Gesonde liggaam; gesonde gees,” uitleef en daarom glo sy aan oefening en gesond eet.

* Carla is in 2013 met 'n Caxton Magazines Excellence-toekenning bekroon vir haar ware lewensdrama-artikels in Vrouekeur.

Sluit venster